Sunday, June 6, 2010

කල එලි මංගල්‍යය ...

ඊයේ දිනය තර්ඩ් මෑන්හට ඉතාමත් සතුටුදායක දිනයක් විය. මන්දයත් මා මෙතෙක් කල් පුන පුනා බලාසිටි, අනාගත ශ්‍රී ලංකා නායකයෙකුගේ විචිත්‍රවත් ඉනිමක් නැරඹීමේ භාග්‍යය උදාවිය. ඔවු ඒ වෙනත් කිසිවකු නොවේ, ඔහු දිනේෂ් චන්දිමාල්. මා කලකටපෙර පැවසූ පරිදි වර්තමානයේ අපට අවැසි වනුයේ මෙවැනි වේගයෙන් පන්දුවට පහරදියහැකි පිතිකරුවන්ය. ඔහුගේ මෙම ඉනිම දැකීමෙන් මාහට මෙතරම් ප්‍රීතියක් ඇති වූයේනම්, ඔහුගේ දෙමාපියන්, ගුරුවරුන්හට කෙතරම් ප්‍රීතියක් ඇත්ද ? විසි හැවිරිදි (මා හා සම වියැතිය) ඔහුගේ ඉනිමේ සුළු අඩුපාඩු තිබුනද, මෙම ඉනිමෙන් ඔහු අපට පෙන්වන්නේ ශ්‍රී ලංකාවේ අනාගතය දීප්තිමත් බවයි.



මා ඔහු පිළිබඳව මීට පෙර සනත්ගෙන් පසු, T20 වසන්තය වැනි ලිපි වලින් දක්වා ඇත. මෙයින් 2009 ඔක්තෝබර් 26 දින "සනත්ගෙන් පසු"හි මා විසින් රචිත කොටසක් මෙසේ උපුටා දක්වමි.

කෙසේ වුවත්, මෙහිදී දක්ෂ ක්‍රීඩකයන් කිහිප දෙනෙකුම දක්නට ලැබුණි. මෙහිදී වැඩියෙන්ම මාගේ අවදානයට ලක් වූයේ ශාන්ත සෙබස්තියන් විදුහලේ සනිත ඩි මෙල් ය. ඔහුගේ ප්‍රවේගකාරී පිතිකරණය මා ගියවර තරගාවලියේ මතකයක් වෙත රැගෙනයාමට සමත් විය. ඒ ගියවර ආනන්දයේ නායකත්වය දැරූ දිනේෂ් චන්දිමාල් වෙතයි. මා ප්‍රථමයෙන්ම චන්දිමාල් දුටුවේ පසුගියවර පැවති තරගාවලියේදීය. එහිදී ඔහුගේ පිතිකරණයේ ප්‍රවේගවත් බවත්, කඩුළු රැකීමේදී තිබූ වෘත්තීය මට්ටමත් දුටු මා එදින විස්මිත විය. එහිදී මා හට කල්පනා වූයේ මොහු ලංකාවෙන් බිහිවන ගිල්ක්‍රිස්ට් කෙනෙක් වන බවයි. එතැන් පටන් මා ඔහු පිළිබදව දැඩි අවදානයකින් පසුවිය.

ඔහු ක්‍රිකට් ක්‍රීඩාවට මුලපිරුවේ අම්බලන්ගොඩ ධර්මාශෝක විදුහලෙනි. ආරම්භයේදී පිට දග පන්දුයවන්නෙකු ලෙස ක්‍රීඩාකළ මොහුගේ පන්දු යැවීමේ ඉරියව්වේ ඇතිවූ ගැටලුවක් නිසා, පසුව කඩුළු රැකීමට යොමුවී තිබේ. ආනන්දයට පැමිණීමට ප්‍රථම ඔහු ධර්මාශෝකයේ 13 න් පහළ, 15 න් පහළ කණ්ඩායම්වල නායකත්වය දරා තිබේ. 2007 වසරේදී ඔහු ශ්‍රී ලංකා 19 පහළ කණ්ඩායම නියෝජනය කරමින්, ඔස්ට්‍රේලියාවට එරෙහිව දවාගැනීම් 8කට කඩුළු රකින්නෙකු ලෙස දායක වී වාර්ථාවක් පිහිටුවීමට සමත්විය. තවද, ඉන්දියානුවන්ට එරෙහිව වාර්ථාකළ 143 හා සීමිත පන්දුවාර තරගයකදී එංගලන්තයට එරෙහිව වාර්ථා කළ 112 ද පිතිකරණයේ ඔහුගේ දක්ෂතා පෙන්වයි.

2009 වසරේදී ඔහු වාර්ථාගත ජයග්‍රහන 12 ක් සදහා ආනන්දය මෙහෙයවීය. තවද, ලකුණු 1580 ක් ලබාගනිමින් පාසල් තරග වාරයේ වැඩිම ලකුණු ලාභියා වීමටද ඔහුට හැකිවිය. අන්තර් පාසල් 19 න් පහළ සීමිත පන්දුවාර තරගාවලියේදී, කඩුළු රකින්නෙකු ලෙස දවා ගැනීම් 64 කට දායකත්වය ලාබා දුන් අතරම, පිතිකරුවකු ලෙස මොරටුව විද්‍යාලයට එරෙහිව ලකුණු 205 ක් ලබාගනිමින් එතෙක් පැවති රසල් ආනල්ඩ්ගේ ලකුණු 170 වාර්ථාව බ්ද දැමීමට සමත්විය. ආනන්දයේ නායකත්වයට අමතරව ශ්‍රී ලංකා 19න් පහළ කණ්ඩායමේ නායකත්වද දැරූ ඔහු, මේ වසරේදී ඔබ්සවර් - මොබිටෙල්, දිවයිනේ වසරේ පාසල් ක්‍රිකට් ක්‍රීඩකයාද විය.

ඔහු තම ප්‍රථම පළමු පෙළ තරගයලෙස සභාගිවූයේ, පසුගිය නවසීලන්ත කණ්ඩායමේ ශ්‍රී ලංකා සංචාරයේදී, ශ්‍රී ලංකා සංවර්ධන කණ්ඩායම සමග පැවති ප්‍රථම පුහුණු තරගයයි. එහිදී පළමු ඉනිමේදී ඔහු ලකුණු 64 ක් ලබාගන්නා ලදි. දෙවන පුහුණු තරගයේදී ඔහු ඩැනියෙල්  විටෝරි ඇතුළු නවසීලන්ත පන්දුයවන්නන් හමුවේ ලකුණු 109 ක් ලැබීමට සමත්විය. වර්ථමානයේදී මොහු ශ්‍රී ලංකා නායක කුමාර සංගක්කාරගේ ආරාධනයෙන් NCC කණ්ඩායමට ක්‍රීඩාකරයි. එහි කඩුළු රැකීමේ කාර්යය මොහුට පැවරීමට තරම් සංගක්කාර කටයුතුකර තිබීම ඉතාමත් ප්‍රශංනීයයි.

අවසානවශයෙන් කිවයුතු කරුණක් ඇත. එනම්, තවත් මෙවැනිම අනාගත තරුවක් සිම්බාබ්වේ සංචාරයට නම්කළ ශ්‍රී ලංකා සංචිතයේ සිටී. ඔහු ළහිරු තිරිමාන්නයි. කුමාර සංගක්කාරට අනුව වර්තමානයේ තාක්ෂණයෙන් පිරිපුන්ම තරුණ ක්‍රීඩකයා මොහුය. මේ වනවිට මෙම තරඟාවලියේ අවසන් තරඟයට ශ්‍රී ලංකාව සුදුසුකම් ලබා හමාර බැවින් හෙට තරඟයට තිරිමාන්නට අවස්ථාවක් ලබාදියයුතු බවයි තර්ඩ් මෑන්ගේ අදහස.

10 ක් අදහස් දක්වලා:

Hasitha said... [Reply]

නියම article එකක් මිත්‍රයා. පත්තරවල ක්‍රීඩා පිටුවලට එහෙම ලියන්න idea එකක් නැත්ද ?

June 6, 2010 at 1:05 PM
දුකා said... [Reply]

හබෑට මම ක්‍රිකට් වලට අකමැති එක වෙනම දෙයක් ඒත් උඹ මේ ලියන විදිහ දැක්කාම හසිත අහපු දේ මටත් අහන්න හිතුනා. . .

June 6, 2010 at 2:54 PM
දුකා said... [Reply]
This comment has been removed by the author.
තර්ඩ් මෑන් (SIDATH) said... [Reply]

දෙන්නටම බොහොම ස්තූතියි !

ෂුවර් නේද මේ බ්ලොග් එක බලල තමයි කමෙන්ට් කළේ කියලා :D

June 7, 2010 at 9:09 PM
Hasitha said... [Reply]

නැතුව නැතුවා :) ඇයි සැකද ?

June 7, 2010 at 9:27 PM
තර්ඩ් මෑන් (SIDATH) said... [Reply]

අනේ මන්දා :P
මේව ඉතින් මට මතක හිටින්න ඕන හින්ද මම ලියන ඒවා.

June 7, 2010 at 10:24 PM
tharindufit said... [Reply]

කොහොමත් සංගාට කීප් කරන්න බෑ.. චන්දිමාල් සිරා.. කලූ වගේ..

June 9, 2010 at 6:37 PM
තර්ඩ් මෑන් (SIDATH) said... [Reply]

@tharindufit
ඔව් චන්දිමාල් කණ්ඩායමේ ඉන්න එකේ වාසිය ගන්න ඕන.

June 9, 2010 at 9:00 PM
Sanoj said... [Reply]

ඇත්තටම මමත් ක්‍රිකට් වලට අකමෑතියි. නමුත් ඔයා ලියලා තිබුන විදිහට කියවන්න හිතුනා...ඔබට ජය!!!

July 17, 2010 at 4:48 PM
තර්ඩ් මෑන් (SIDATH) said... [Reply]

@Sanoj

අනේ සමාවෙන්න මිත්‍රයා. අදයි දැක්කෙ ඔයාගෙ කමෙන්ට් එක. බොහොම ස්තූතියි දිරිගැන්වීමට :)

December 10, 2010 at 6:40 AM

Post a Comment

ඔයාලගෙ අදහස්, යෝජනා, චෝදනා මට බොහොම වැදගත්. ආපු එකේ මොනවහරි කියලම යන්න.

සිංහලෙන් ලියන්න